هناء الحديدي _ المنصورة

 

طالبت فتاة تدعى أ. م.ع.م ، تبلغ من العمر ١٩عاما من قرية دشنا التابعة لمدينة أجا دقهلية ، باثبات نسب طفلتها واستخراج شهادة ميلاد لها عن طريق تحليل dna ، بعدما قام شاب يدعى م٠خ٠ع٠ا بخطفها واغتصابها بمكان مهجور ، مما ادى الى حملها وحررت محضرا بمركز شرطة أجا،حيث قام الجانى بالهروب وإرسال عدة تهديدات لاسرة المجنى عليها ، حيث طالبت أسرة المجنى عليها بالقبض على الجانى وتقديمة للمحاكمة بتهمة الاغتصاب وهتك العرض لإثبات نسب الطفلة.

 

تروي أمل قصتها قائلة : كنت مبسوطة اني اتخطبت وخلاص هكتب كتابي وأروح مصر أكمل هناك تعليمي، يومها قلت في الدرس للمدرس أنا هودعكم انهاردة، عشان خلاص همتحن وهكتب كتابي وهروح مصر مش هتشوفوني تاني".

 

لم تدرك الطالبة أن فرحتها لن تكتمل، بعدما قرر المتهم فعل فعلته ، فلحق بها وظل يطاردها في الشارع ، فروت أمل قصتها : كانت الساعة 8 بليل والبلد هادية خفت منه قعدت ألف في الشوارع، لحد شارع ساكت وهادي خبطني وفضل يشد فيا ، قعدت اصرخ بس كان أقوى مني، وقالي عشان فكرتي تتجوزي غيري مش هخليكي تفرحي، أغمى عليا من الخبط فيا، ولما فوقت لاقيت هدومي فيها دم ومش قادرة أقف على رجلي ، ولما قمت جريت على البيت محسستش حد بحاجة فضلت أعيط في أوضتي مش عارفة اعمل أيه ولا أقول أيه لأمي ولا لخطيبي ، لدرجة خدت حبوب عملت لي غيبوبة ودخلت المستشفى لحد ما فوقت".

 

هذا ولم يكتف المتهم بجريمته ، بل قرر أيضا الانتقام من خطيبي ، وبعت رسالة لخطيبي قاله إنت مش هتعرف تتجوزها بعد اللي عملته فيها وقفل تليفونه واختفى ، بعدها خطيبي قال لأمي، وعرف أعمامي في القاهرة وسابني .

 

وتكمل أمل قصتها : بعد معرفة أعمامي قرروا سفري لهم واجباري على الزواج من قريب لهم على الفور و خدوني حتى من ورا أمي ، وهناك ابن عم أمي كتب عليا لكن مقربش مني، كتب ومشى عشان يداروا اللي حصل ، لكن أمي رجعتني البلد بقوة الأمن ، لاني كنت قاصر وفضلت معايا ورقة الجواز من الشخص اللي اتطوع يكتب عليا وخلاص .

 

بعدها روحنا وعملنا محضر برقم 9103 بمركز شرطة أجا، لكن للأسف هرب واستدعوا أبوه وقتها ، و اتبلى عليا وقال إني كنت على علاقة بابنه وإن الموضوع كان بمزاجي، والطب الشرعي هو اللي نصفني ، وأثبت واقعة اغتصابي ، بعدها تعبت جدا وروحت للدكتور مع أمي، وهناك قالولنا إني حامل في الشهر التاني، يعني من وقت الحادثة، واتلهيت في الحمل وتعبه وكنا بندور على اللي عمل كده حتى بنفسنا ، حتى المحامي اللي كان معايا قعد يماطل لحد ما ولدت بنت في ديسمبر 2018 ولسة مسجلتهاش، بقى عندها دلوقتي أكتر من سنة ، و لسة دايرة في المحاكم بعد ما رفعت قضية لكن للاسف المحامي سابني ، أنا عاوزة اعمل تحليل dna والبنت تتنسب ليه تعبت من المحاكم والقضايا والتحقيقات ، عاوزة أوصل لإثبات نسب بنتي قبل ما تكبر وتسأل مين أبوها .